అడుగు జాడలు  ...

శ్రీకర నీ వరచరణము
లాకరములు సౌఖ్యములకు, నా కరమందున్
నీ కర సరసిజమిడి, కరు
ణాకర! కడదాక గాతునంటివి గాదే!
తోడుగ నేనుండెద, నా నీడన నీ జీవన కుసుమోదయమౌ!
భారము నాదే, నీ సంసారము నీదే
ఆ స్థైర్యము,ఆ ధైర్యము, ఆ వీర్యము యొదవించెద, ఎదనిన్చెద!
చుక్కానై ప్రక్కన నేనుంటా,నా యక్కున నినుగొంటా,
గ్రక్కున నిజ కరుణారస దృక్కుల నినుగంటా!
నీవిక 'నా జీవిక కడు భారము, కడు దూరము సుఖ తీరము,
నే కనజాలను,మనజాలను, వినజాలను జీవన సుఖ శృతి సారము!
హితుడా,స్నేహితుడా,నా భర్తా! ఓ కర్తా! రమ్మంటే,
నీ భారము నే మోస్తా! జీవిక కడ దేరుస్తా!
మోహన సుఖ జీవన నవ వీణియ నై నే మ్రోస్తా!.. అనలేదా?
సంసార సాగర సరిత్తీర సైకత శ్రోణుల నిను వెన్నంటి నడుస్తా!
వస్తా! నే వస్తా! యన లేదా?వస్తా! నే వస్తా! యనలేదా?
ఆలోచనాలోచ నాలోల కల్లోల సంసార సంవేదనా రోదనాక్రందనా సాగరావర్తినై,
కష్టాల నే బడసి, దుఖ్ఖాలలో దడిసి, మోహాలతో డస్సి, పాపాలతో క్రుస్సి,
మనో గవాక్షంపు పక్ష్మముల నే దెరచి, నీకై నే జూస్తే..
ఒంటిగ నే నుంటినయా..నా యడుగులు కంటినయా..
ఏదీ నీ యడుగుల సడి?ఏదీ నీ అందెల ధ్వని?
ఏవీ నువు నడయాడిన చిరుజాడలు?
నా ఆశల సుమ పేశల మధురోహలు మను మేడలు?
విను వత్సా!ప్రవచిస్తా! తెలియరావు నా క్రీడలు!
నువు జూసిన ఆ జాడలు..నా పదములు, నా నీడలు!
జాలి,కరుణ మొలకెత్తి..
నిక్కము, నిను తలకెత్తి..
ఒంటిగ నేనే నడిచా!
కంటినీరు నే తుడిచా!
నీ బాధలు,నీ గాధలు,నీ బరువులు నిన్ను మోసితి!
నీ పయనము నేనే జేసితి!!  
 (అజ్ఞాత ఆంగ్లకవి "FOOT PRINTS" స్ఫూర్తి తో... )

Truth...

 
That never says of Which All say

 Never listens and listened Night and Day

Never Seen and sees through this Fray

Untouched, Unknown  is that Way

He She and It is that Hey!

You, He and I all That Sway

Secret,Future,Past,This Day

Is That Flow,That Glow.That Ray

He that Hero,Is that Zero,Endless Morrow

Sublime,Obscure Smile and Sorrow

Addition, Deletion Fast and Slow

Knows it Not, that Perennial Flow 

One Path and Faith and Final Truth

Love,Give.Forgive All and Soothe

Forget, for, Me, Mine is Nothing

That Thing,is,  that Endless Nothing

 

Adieau! Farewell, Friends and Foes

For You gave the Joys and Woes

When He comes and Takes Us There

You, He and I rest in Where

Peace prevails and Desires Die

There the Divine Swan will Fly !!

మందార మకరందాలు

మాధవ సంబంధాలు,మధుర భక్తి గంధాలు 

మధురస నిష్యందాలు, మధుసూదను చందాలు

మహనీయుడు పోతన పలుకులు మాగిన వని మాకందాలు

మందార మకరందాలు,మందార మకరందాలు....

కవికులములకందాలు,కవితారస గంధాలు,

కావ్య కన్యనూరేగించిన కవనవిరుల స్యందాలు,

ప్రకృతి పురుష బంధాలు, ప్రణవార్ధ ప్రబంధాలు

ప్రవిమలులకు స్వాంతాలు ప్రశాంతమౌ ప్రాంతాలు.....

కరివరదుని గడసరి నటనలు కమలాసతి చిటిపొటి అలకలు,

కరిపైకెగిరిన హరి శ్రీ హరి కనత్కనక కుండల కళలు, 

గాంగేయునిపై గారంగా,గోపికలకు సింగారంగా,

ఆనందాంగన ఒడిలోగిలి ఆనందాంబుధి మునుగంగ.....

పార్ధుని రధమునకట సారధి,పాత్రులకట కరుణావారధి,

పాపనికట జోలలు నీరధి,పాత్ర యానమట భవనీరధి,

ఒక పామును పడగ దొక్కినా, ఒక పామును పడకగెక్కినా,

ఎవరెవ్వరి కృతము లెంతలో , వారికైన హితము లంతలై...... 

సంగరమున కురిసిన వేదం, సంగడీల విందు వినోదం,

సామగాన సరస సుధా రస వేణుధార ధరణికి మోదం,

ఏనుగొకటి రక్షణ గొనినా, ఒకటి మరణ శిక్షను గొనినా

ఎరిగిన వాడెవడిది ఎదలో హితులహితులు ఆతనికెవరో.....

ఇంతింతల వటు డింతలుగా, ఆకసమునకల్లంతలుగా,

ఆద్యంతము లెరుగ నంతగా, పద పీఠం పాలపుంత గా,

భిక్ష గొనుట మోక్ష మిడుటకని,శిక్షించుట రక్షించుట కని,

ఎదిగెను శ్రీహరియా? పొంగెను  పోతనదౌ కవితాఝరియా?

కనక కశిపు వక్షద్విదళన ఖరనఖ ముఖరిత కరుణా ఝరి

ఘన కరుణను తరుణి కుబ్జను అబ్జముఖిని జేసిన శ్రీహరి

గోవుల, గోపాలుర, పాలుర,బాలుర,గుణ ధాముల, భామల

గావగ ఘను డాతడొక్కడే ,ఘన కవితకు పోతనొక్కడే...... 

           వివేక శంకరం.

వివేక శంకరం.. వివేక శంకరం!!

ప్రణామ్యహం పరాశరాత్మజం జ్ఞాన భాస్కరం  

నమోస్తు ఆదిశంకరం సమస్త లోక శంకరం

జయోస్తు తే వివేకినం విశిష్ట విశ్వ లోకినం

స్మరామి జ్ఞాన,భక్తి,త్యాగ మార్గ తత్త్వ దర్శినం       

వివేక శంకరం..వివేక శంకరం!!

వేద  వ్యాస జ్ఞాన మార్గ వాహినీ సరస్వతీ

ఆది శంకరాఖ్య   భక్తి మార్గమౌ పవిత్ర గంగ

వివేక త్యాగ వాహినీ  విశిష్ట యమున సంగమంగ

సోదరా! త్రివేణి.. సోదరీ! వినండి భరత వాణి            

వివేక శంకరం..వివేక శంకరం!

భారతీయమైన వేద మార్గ ధర్మ మర్మదం

మానవీయమై  పునాది సర్వ కర్మ శర్మదం

మాననీయమై మనేది మమత ధ్యేయమై చనేది

మన ధ్యేయం ఈ వసుధే కుటుంబ  మొకటనేది  

వివేక శంకరం..వివేక శంకరం!!

శివంకరం, శుభంకరం, సమానతా లతాంకురం

సుభావిదం, సుఖప్రదం,సురత్త్వ  మార్గ తత్త్వదం,

వందనీయమైన హైందవీయ ధర్మ దర్శనం

అందమైన సర్వ విశ్వ నిత్య  సత్య స్పర్శనం   

వివేక శంకరం..వివేక శంకరం!!

పరమవీర చక్రం!

భరత మాత వీర సుతుల బతుకు బాటల క్రమం

భారతీయ మహిళల ఘన పతుల సుతుల  పరాక్రమం

ధర్మ రక్షణకు తరలిన దామోదర చక్రం

కర్మ వీరుడౌ సిపాయి ధరియించే చక్రం

పరమ వీర చక్రం! పరమ  వీర చక్రం!

  

ప్రచండ విక్రమార్జితం, అఖండ త్యాగ స్వార్జితం

తమ  జన ధన మాన  ప్రాణ అనురాగ వివర్జితం  
అనితర మౌ శౌర్య ధైర్య ఫలితమై అవక్రం

మనకోసం మరణించిన వారి చరిత సమగ్రం

పరమ వీర  చక్రం! పరమ వీర చక్రం!

మన కొరకై తమ కదనం, తమ కొరకై ఈ కథనం,

పొలికలనిక తమ సదనం, కదన కడలిలో మథనం,

అమృతం మనకిడుట కొరకు, అశ్రులు తమ వారి కొరకు,

అంజలితో  అంకితమిది వారి ఆత్మ శాంతి కొరకు

పరమ వీర చక్రం! పరమ వీర చక్రం!

తమ వేదం మన మోదం, మనకు విందు వినోదం,

మన వెలుగుల కొరకు చితులు, తమకై విలపించు సతులు,

మనవారికి  దీపావళి, వారివారు  శోకావళి!

నిండు మనసుతో వారికిదే నిజాయితీ నివాళి!

పరమ వీర చక్రం! పరమ వీర చక్రం!

తెలుగు తమిళ మలయాళీ ఒరియ కన్నడ  గుజరాతీ

మధ్య ప్రదేశ్, మహా రాష్త్ర, బెంగాలీ, పంజాబీ,

హిందూ,ముస్లిం,క్రైస్తవ,సిక్ఖు జాతి కానిదీ,

ఏ భేదం లేని భారతీయ వీర జవానుదీ 

పరమ వీర చక్రం! పరమ వీర చక్రం!

             ఆడపిల్ల..

అమ్మా నాన్నలవబోయే   వారంతా   వినండి 

కంటే  ఆడపిల్లనొక్క  దాన్నైనా  కనండి 

కసాయిలై కడుపులోనిదమ్మాయని చంపకండి

ఘోర  రుధిరధారలతో చరితపుటలు నింపకండి ....

ఆలుమగలు  అవగాహనతో కలసి పదండి

అమ్మా నాన్న  లౌటయే అదృష్టము కదండీ

ఆడపిల్ల లైనా, మగ పిల్లలైనా  

అమ్మా నాన్నల కన్నుల  కలల ఫలములండి.. ...

అమ్మలార! అనురాగపు సిరుల విరుల కొమ్మలార!

నాన్నలార పసి గుండెల కండ వెన్ను దన్ను లారా!

ఆడపిల్లలున్న గాని అమ్మ చలువ ఆలి విలువ

అనురాగములెరుకరావు అహపు పొరలు వీడి పోవు....

పువ్వులతో, మువ్వలతో,పులకరింత నవ్వులతో

పారాణీ,పరికీణీ,ఓణీ, యువరాణితో

జడ కుప్పెలు , చెమ్మ చెక్క చేరడేసి మొగ్గలతో 

సంతోషపు సామ్రాజ్యం,లేక, సిరులు పూజ్యం!....

అచ్చమైన ప్రేమల  అరవిచ్చిన సిరిమల్లెలు

తల్లిదండ్రులకు తరగని ఆస్తులాడపిల్లలు

కనికరమే లేక కాలికింద  వేసి నలపకండి

కసిదీరా పసికందుల గొంతులనే నులమకండి....

మీ అమ్మా  నాన్నలో..  వాళ్ళమ్మా  నాన్నలో  

మీలాగే అనుకుంటే మీరీనాడెక్కడ?

స్త్రీ  పురుషులు చక్రములై కదలక యిరు  ప్రక్కల 

సంసార రధానికి గతి,  ఈ జగతి ఎక్కడ?......

ఆడైనా, మగైనా ఒకటిగాదరిస్తై ... 

పశు పక్ష్యాదులు సైతం శిశులచేరదీస్తై!

ఆడపిల్ల నాకొద్దని తల పోసి ఉసురు దీసి,

విసిరేస్తే.. పశువా! యని పశువులు నిను నిలదీస్తై....

ఆకలి వేళల తల్లిర , అర్ధాంగిగా రతిరా,   

మగని కొరకు మంత్రిణిరా ,గృహ సీమ నియంత్రిణిరా,  

సేవలలో దాసిరా,  స్నేహభావ రాశిరా,  

సహనంలో ధరణిరా, 'త'త్సారం తరుణి రా.....

శిశు హత్యలు చేయకండి, సిగ్గునొదిలి వేయకండి, 

ఆడపిల్ల మల్లె మొగ్గలోనే చిదిమివేయకండి,

పస్తులతో పెంచినా, పుస్తెలతో పంపినా,

అమ్మా నాన్న లని తలచే  దాడపిల్లలేనండీ   !....

పోలీసు..

ఓ పోలీసు సహోదరా!నువు పాడని వీర గాధరా!

నీ త్యాగం తీసి పోదురా బలిదానం మరపుకు రాదురా! 

నువు సాగే జీవిత బాటలు కాదోయీ పూవుల తోటలు

నీ ధర్మం  ఫలితము కోరకే  కొనసాగుట నిత్యం పోరుకే ... 

పదవుల చదరంగపు టాటలో పై పై అధికారుల పావువై

అరుకాషుడి బారిన  పడితే వ్యధలై కధలవి తుది మొదలై

దూర భారమైన బదిలీపై  జీవిక కొరకై  కదిలీ

సాగిపోవు బాటసారీ..ఆగి  పోవు ఒక్క సారీ....

ఆవేశపు మార్గపుటన్నలు,  తమ దారులుతప్పిన తమ్ములు 

ఎవరిని విడిపించాలో, ఎవరిని ఇరికించాలో,ఎవరు దేశ భక్తులో, తీవ్రవాద శక్తులో

మారుతాయి  వ్యాఖ్యానాలు, మీరు మౌన కార్ఖానాలు

ప్రభువులు మారినప్పుడు మారాలట మీరెప్పుడు ...

కొండలలో, కోనలలో, కానలలో, వానలలో

ఎదురీతలు వరదలలో ఎదురెదురుగ  కాల్పులలో 

నీ  సమాజ రక్షణలో, నాయకుల నిరీక్షణలో

నీవట నీవారికి గుబులై నిలిపేరట చూపులు వాకిట.. 

సందులలో, గొందులలో,బందుల ఇబ్బందులలో

నిరాహార దీక్షలో , నీ బతుకు పరీక్షలో,

గెలిచి నిలిచి నవ్వే నువ్వు రోషం తో మీసం దువ్వు

మంచి పెంచు వంచన తుంచు దీనులకై దేవుడవ్వు..

శెలవు లేదు, నెలవూ లేదు,ఇట్లాంటిది  కొలువే లేదు

ఈ సమాజ రక్షకుడవు నీ బ్రతుకునకే రక్షణ లేదు!

బుల్లెటు జల్లుల జల్లెడైనా నీ దరహాసం వాడదు!

ముప్పులకూ మెప్పులకూ లొంగి పోవు, పొంగిపోవు!... 

స్నేహితుడా  పురోహితుడా ఈ  సమాజ రక్షక భటుడా!

చివరిగ నీకొక మాటరా మన దందరిదీ ఒక బాటరా

మా అందరితో నువు  కలసి పో నీవందరి వాడిగ నిలిచిపో

అందరి కొరకై ఒక్కరం  ఒకరి కొరకై  వుందామందరం....  

యూనిఫారమే   లేకున్నా యూనిఫారమందు  వున్నా

 ప్రతి పౌరుడు రక్షక భటుడై రక్షక భటుడూ తానొక పౌరుడై

నీ చేయీ నా చేయీ కలిసిన మనదే పై చేయీ

అసాంఘిక స్వార్ధ శక్తులపై,దుర్మార్గుల క్రూర  కుయుక్తులపై... 

వైద్యో నారాయణ హరి.. 

నడిచే నారాయణుడు, ప్రాణి  సేవ పరాయణుడు

వైద్యో నారాయణ హరి, వైద్య వృత్తి కేది సరి ?

దివ్యగీత, శాంతిదూత, ప్రాణదాత వైద్యుడు

కనిపించే, కరుణించే దేవుడురా వైద్యుడు

ప్రాణాలను పోసి, నిలిపి దీవించే దివ్యుడు

వైద్యుడంటే ఇలలో నడయాడే   దేవుడు......

కనిపించని బ్రహ్మకన్న  కని పెంచే అమ్మకన్న

కడుపులోని శిశువుకు వినిపించే తొలి పలుకు కన్న

ఘనమైనది తన  వృత్తి  పవిత్రమైన దా   ప్రవృత్తి

నిఖిల  వేద వేద్యుడైన శ్రీ హరి సరి! వైద్యుడు  !!.........

అమ్మకు వినిపించనిది, ఆలికి కనిపించనిది

నాన్నకు  విడమర్చనిది, మగనికెరుక పర్చనిది 

ఏదున్నా లేదన్నా   తనకు విశద పర్చనిది 

తనతో లేదే మర్మం నిగమ గంగ తన  ధర్మం......

అసహ్యించుకోని అమ్మ ,ఆశనిలుపు నడుపు నాన్న

మన  క్షేమం కోరే స్నేహితుడై మన  హిత రతుడై

అమ్మకన్న ఆలికన్న నాన్నకన్న మగనికన్న

మిన్నగదరి  జేర్చుకొన్న  ఆదరించు పెద్దన్న......

వైద్యులార, ప్రాణదాన ప్రణవవిద్య కాద్యులార!

వైద్య రాజ నమోస్తు తే యమరాజ సహోదరా

యముడు దోచు ప్రాణములే మీరో ధన మానములూ

ప్రాణములూ దోచుకొనే బందిపోట్లు కాకండి!!........ 

తల రాతలు మార్చ కండి విలువలు  దిగజార్చకండి

కసాయిలై దోచి  మొసలి   కన్నీళ్లను  కార్చకండి 

చావుపుట్టుకలలో మర్మం పేకలు పడుగులే 

మీకైనా మాకైనా మిగిలేదారడుగులే............

గుండె గుడుల  దేవుళ్ళూ గుది బండలు  కాకండి

కూడు గూడు గుడ్డ లేని వారి వెతలు మరవకండి 

వారికుంది బ్రతుకు  హక్కు వారూ మీ  బాధ్యత

సాటి మనిషి  సౌఖ్యంకై సాయ పడుటె  సభ్యత...

మానవతకు కొరత వేసి సిగ్గెగ్గుల శిలువ వేసి

రోగంకన్నా భారంగా రోగికి మారకండి

జలగలనే మించకండి చివరికి తల దించ కండి  

అమ్మలాగ అనురాగపు చిహ్నాలై నిలిచిపొండి!!!..........

అనవసరంగా   కడుపులు కోయకండి ...  ఆపండి

శవాలతో   వ్యాపారం ,పేదకు  నిర్వ్యాపారం 

పీనుగులకు  వైద్యాలు ,వేదన వాయిద్యాలు,అపుడే ఇక సాధ్యాలు  

మనసుల మాగాణులలో మమతలనే సేద్యాలు!!!

మహిళా మణి దీపాలు 
మానవతకు రూపాలు, మమతల తొలిరూపాలు
మనిషీ నీ ప్రతి విజయంలో మరువకుమా సగపాలు
మహిళా మణి దీపాలు!!మహిళా మణి దీపాలు!!

తల్లిగ తన రుధిరము పాలు, చెల్లిగ తను గొని మురిపాలు
ఆలిగ ఆ వలపుల జాలు కూతురుగా కులుకుల సోలు 
నీ నీడై తోడు నడుస్తూ, నువు పడితే పడి ఏడుస్తూ
నీ దౌష్ట్యం తాను భరిస్తూ, నీ బతుకుకు వెలుతురునిస్తూ
వెలిగే ఘన దీపాలు! మహిళా మణి దీపాలు!!......

కసిదీరా కాటేస్తుంది, కరుణిస్తే సరి జేస్తుంది
వలచిందా మురిపిస్తుంది, వగలాడై మరిపిస్తుంది
ఆడదిరా ఆది శక్తి! ఆవిడ దయ నీ భుక్తి
ఆడ పిల్ల కాదు శాపం, ఆ నవ్వే ఇంటికి దీపం
గృహమను గుడి దీపాలు! మహిళా మణి దీపాలు!..........

దేశానికి ప్రథమ మహిళగా, ద్వేషానికి ప్రమథ మహిళగా
మంత్రిణిగ, నియంత్రిణిగా, కౌటిల్య కుతంత్రిణిగా
ఝంఝానిల  ఝాన్సిస్ఫూర్తిగా, రుద్రమాంబ రౌద్ర దీప్తిగా
ద్రౌపదిగా ధైర్యమూర్తిగా, ధరణిజగా ధన్యకీర్తిగా
ధర వెలిగిన దీపాలు!మహిళా మణి దీపాలు!.........

సమవర్తికి సరి సావిత్రి, సహనంలో సాటి ధరిత్రి
కైకే ఇక ఈసు నసూయకు, కైజోతలివే అనసూయకు
ఆకసమున వెలిగేది రమణి అరుంధతిగ అనంత కాలం
హరిహరబ్రహ్మాదులకైనా ఆడదిరా ఆది మూలం
జగతికి జవ, జీవాలు! మహిళా మణి దీపాలు!!.....

తూరుపు వేకువ వెలుగుల వేణువు

జీవన వని నిశి చీల్చే భానువు

ఉషః కాలమున ఉద్యమించుమని

సప్త వర్ణముల సప్తస్వరముల

జాగృత గీతాలాపన చేస్తూ

ప్రభాత తుషార సుమాల మాలిక

విశ్వపు గళమున వేస్తుంది

ప్రబోధ గానపు ప్రమోద మానస కడలి తాండవం చేస్తుంది..

 

భారతి - హారతి

శ్రీ నిధీ,యశోనిధీ, స్వతంత్ర స్వర్ణ భారతీ!
విషాదమే సశేషమై జ్వలించు అశ్రు హారతి!
వివర్ణమా,వికీర్ణమా,విశీర్ణ జీర్ణ పర్ణమా!
విచీర్ణమా!విషాద నీల లోచనా విఘూర్ణమా!
స్వతంత్రమా?కుతంత్రమా?మతి భ్రమించు మంత్రమా?
పాపమా?విలాపమా!విపణి గొన్న శాపమా?
మా రాతలే విధాతలై,జనత భావి త్రాతలై,
నేతలై,విఘాతలై,భవిత గూల్చు చేతలై,
మాకడ నీడలు నడుస్తున్నై,మాకిట  పీడలు గడుస్తున్నై,
మానవ రక్తం రుచి మరిగిన పులి పంజా జాడలు తెలుస్తున్నై,
మందిర కుడ్యం,మశీదు గోడ,మమతల కోవెల,మానవతాలత 
తడిసిన మానవ రక్తపు జాడలు మెరుస్తున్నై!
మా కడ నీడలు నడుస్తున్నై!మాకిట పీడలు గడుస్తున్నై!
మనుషులందరూ ఒకటి కాదా?మానవత్వం నిజం కాదా?
మనుషులందరూ ఒకటి కాదా?మానవత్వం నిజం కాదా?
మనిషి బతుకు నిత్యం  కాదోయ్ మానవత్వమే సత్యమోయ్!
అమ్మా భారత మాతా!దశ దిశాంత చిర విఖ్యాతా!
నా  డెందము కుందిల జేసే ఈ వంతలు బాపవె అమ్మా!
రాముదో,రహీముదో,దయాన్తరంగుదో ..
శాంతి కాముదీ ధరణియై రహించు స్వర్గ ధామమై!
శ్రీనిధీ,యశోనిధీ,స్వతంత్ర స్వర్ణ భారతీ!
యుగానికీ,  జగానికీ  ప్రశాంత ప్రేమ హారతీ!