వేములవాడ


రాజేశ్వర రాచ నగరి వేములవాడ

రావణారి శ్రీరాముని నిలయం కూడా ||
శివ భక్తుడు శ్రీ రాముడు రామ భక్తుడైన శివుడు

కొలువిక్కడ దీర్చినారు కొలిచిన దరి జేర్చు వారు ||  

ఎడమచేత విల్లు, వింటి పక్కన ఒక హరివిల్లు,

హరుని విల్లు విరిచిన హరి వరియించిన సిరి జల్లు,

గొడుగుగ,ఒక పడకగ,అడవులకు తోడు నడకగా

నడిచిన తమ్ముడు నిలిచిరి శ్రీ రాముని కిరుపక్కల ||

కుదురుగ తనకెదురుగ తన దాసజనుల గురుతుగ

ఆంజనేయుడై కొలిచిన ఆది పరమ శివుడట

తమ్ముడితో, అమ్మడితో, కరముల విల్లమ్ములతో

అంజలితో హనుమతో అయోధ్య విభుని కొలువిట ||